Tayer “Ekspresá Bo Mes – Let’s Talk Youth Talk”
Asosiashon di Guia Curaçao (AGC) ku sostén finansiero di UNESCO a organisá febrüari 2026 un tayer speshal pa hóben entre 15 te 23 aña bou di e título “Ekspresá Bo Mes - Let’s Talk Youth Talk”. E programa tabata unu dinámiko, interaktivo i di kalidat haltu, fasilitá pa organisashon Toastmasters Simadan.
A habri i marka tono di tayer ku palabranan di Kyra Römer, Presidente di AGC, ekspresando ku “Liderato no ta kuminsá ora bo bira adulto. E ta kuminsá awor, ora bo siña usa bo bos.” Kyra a sigui elaborá ku hóbennan ta kresiendo den un tempu kaminda ta esensial pa sa kon pa papia, pensa krítikamente i defendé un punto di bista sin pèrdè rèspèt pa otro.
Durante e tayer a pone enfoke riba desaroyo personal, komunikashon efektivo i konsientisashon sosial, kaminda hóbennan a haña hèrmèntnan práktiko pa ekspresá nan mes mas mihó, pensa promé ku papia i komuniká ku klaridat i seguridat.
Na final di dia, a repartí e hóbennan den grupo di kuater persona pa debatí riba e dos temanan “Hende muhé ta débil i mester yudansa di hende hòmber” i “Mester hasi posibel pa tur hende dal un cheiba ratu ratu”. Evaluashon di e presentashonnan tabata hasí dor di un kuerpo di hurado riba kontenido, argumentashon i manera di ekspresá.
E hóbennan a demostrá di a bira mas konsiente kon ta presentá ideanan i tambe sostené un opinion ku rèspèt.
Asosiashon di Guia Curaçao ta yama danki na UNESCO, ku ta sigui invertí den empoderamentu di hóbennan i fortalesementu di liderato na komunidat.